- Инспекторите да престанат со малтретирање на лозарите и со манипулациите со примената на измените на законот за вино. Побарав Владата веднаш да донесе интервентни мерки за откуп на вишокот заради стабилизација на пазарот. Побарав државата да биде гарант на откупот, изјави дополнителниот заменик министер за земјоделство, шумарство и водостопанство Љупчо Николовски на посетата на Неготино.

- И добро е што нашиот притисок над Владата почнува да дава резултат. Но мерката за помош на винарските визби односно откупувачите, која се однесува само на ограничено количество откупено грозје и тоа само од сортата вранец, не значи ништо за лозарите. Нема никаква директна поддршка во цената што треба да ја добијат, а да не зборуваме за исплата на штетата што лозарите ја претрпеа од несобраното грозје коешто досега остана да калира- рече Николовски.

- Да биде трагедијата поголема, огромен број лозари немаат добиено пари ни за предаденото грозје од минатата година.Нам ни се потребни системски, а не ад-хок решенија, затоа што Министерството мора да ги има сите анализи и инфорамции за производството на лозарите, залихите на визбите и потребите на пазарот.Нема да дозволиме оваа мерка на Владата да биде само инструмент за остварување на лични интереси на поединци од власта вклучени во овој бизнис и за уцени и притисоци над лозарите пред избори - рече Николовски.

На оваа изјава на Николовски, реагираше Министерството за Земјоделство, Шумарство и Водостопанство:

- Проблемите со откупот на македонското грозје од реколта 2016 се практично решени и дека нема потреба од интервентен откуп, наведува Министерството за земјоделство, шумарство и водостопанство во реакцијата на изјавата на дополнителниот заменик-министер Љупчо Николовски.

- Потврда за тоа се изјавите на претставниците на винарските визби, кои на состанокот пред два дена рекоа дека состојбата ќе се стабилизира со новата мерка на Владата која предвидува субвенции од три денари по килограм „вранец“ за сите винарии кои ќе откупат винско грозје во 2016 година, за количини кои се над 60 проценти, но не повеќе од 130 отсто во споредба со ланските откупени количини од сортата „вранец“.

- Со оваа мерка се стимулира откупот на винското грозје во ситуација кога, како што кажаа винариите, на европскиот пазар била понудена пониска цена поради големиот наплив на вина од многу земји, се вели во реакцијата.

Притоа се додава дека во времето на СДСМ, иако грозјето не било платено, не бил воведен интервентен откуп. – Очигледно СДСМ само кога е во опозиција глуми загриженост за земјоделците и ветува мерки кои реално не се остварливи, велат од МЗШВ.