СИТЕ ЛУЃЕ СЕ ЕДНАКВИ САМО НЕКОИ СЕ ПОЕДНАКВИ ОД ДРУГИТЕ

Синоќа во фоајето на Домот на културата „Иван Мазов Климе“ беше отворена изложбата „Што е следно“ овозможена преку проектот за ЛГБТИ Инклузија 2.0, финансиски подржан од ИЛГА Европа а имплементиран од страна на на ЛГБТИ Центарот за подршка во партнерство со Коалиција Маргини. На изложбата беа присутни и претставници на Хелсиншкиот комитет за човекови права. Воведниот говор беше на Владимир Темков а за самиот проект говореше Ангела Витанова која е автор на проектот. „What comes next?!“ е проект започнат од декември 2019г., замислен како групна изложба од интерактивен, интердисциплинарен и колаборативен карактер, каде преку рецентни дела, создавани директно како визуелен продукт на вистинските животни ситуации низ кои поминуваат трансродови луѓе, ќе се искаже сето она низ што со годините наназад поминале овие индивидуи, сето она низ што денес, можеби во овој момент го поминуваат. Сите животни приказни, беа собрани по пат на однапред остварени лични контакти и познанства, а во рамките на проектот, во текот на месец февруари, беше објавен и јавен повик за собирање на животни приказни од трансродови лица, кој во соработка со трансродови организации беше раширен низ целото балканско подрачје, така што заинтересираноста и пристигнатиот број животни приказни, беше поголем од очекуваниот. Учесници на оваа изложба се Дарко Алексовски, Јасмина Руневска Тодоровска, Лео Збанке, Јана Николовска, Алекс Ристовски, Ивана Самандова, Даниел Проданов, Јана Јакимовска, Лила Милиќ, Драгана Пендовска и Бурџу Мусли.

м.в.