Промоција на книгата „Тој и јас” од Гордана Винчиќ е закажана на 7 декември во Домот на култура „Кочо Рацин” во Скопје со почеток од 12.00 до 14.00.

Гордана Винчиќ е слободен уметник со над 20 самостојни и повеќе од 40 групни изложби во Македонија, Франција, Англија, Русија, Мароко, Кипар итн. Повеќе од 20 години таа живееше и работеше во Шведска каде меѓу другото реализираше над 300 ликовни работилници за ранливи групи во општеството.

Досега Гордана има изработено над 3000 уметнички дела, цртежи, слики, илустрации, графики, дигитални цртежи, инсталации, мурали и реди мејд склуптури.

Деновиве излезе од печат нејзината прва книга која е во целост посветена на нејзиниот татко, познатиот и признат македонски и југословенски археолог, доктор на науки Живојин Винчиќ. Неговиот докторат „1000 години антика во Тиквешијата” го има во стручните библиотеки ширум светот.

-„Постојано ме носеше на локалитетите каде што се вршеа ископувања во Македонија. Уште од дете научив за митологијата, симболите, традицијата, филозофијата и поезијата. Постојано споделуваше интересни приказни од далечното минато и настојуваше да ја разберам важноста од чување на автентичноста и културното наследство од предците. Токму тој ми ја разви огромната желба за истражување на несекојдневни и невообичаени настани во секојдневниот живот. Тоа се гледа и во моите дела, инспирацијата доаѓа од дамнешните културни наследства, симболите и митологијата претставени во современа изразна форма”-вели авторката Винчиќ

Поврзаноста меѓу таткото и ќерката, меѓу уметноста и археологијата, меѓу животот и смртта се волшебно преплетени во оваа книга насловено како „Тој и јас”.

Ова дело е толку интимно...емотивно...длабоко...убаво...толку ликови и години се преплетуваат. На овој начин се пренесува и остава Дрвото на Животот на нашите деца со сите потомци пред нас. Таа горда на својот татко и таа Гордана на Живојин Винчиќ.

Прекрасен и непроценливо најубав дневник за духовното, едукативното, физичкото, емотивното растење на својот татко, дневник во кој се вткаени сите прекрасни спомени од своите најблиски предци. Компарацијата со реките алудира на разновидни периоди од патот по кој тој минал. Чистата вода е моќна исцелителка и животна водителка. Со заминувањето на Живојин Винчиќ на некое друго подалечно место, можеби некаде по синото небо со другарите фрла мрежи испреплетени со рибарски приказни, не престана неговата кауза – секогаш да се помогне таму каде што треба. Таа улога ја продолжи и во неговата ќерка Гордана.

-„Додека работев во Шведска каде што ги завршив студиите за социјална работа, уметничката изразна форма ја користев како важен дел во терапевтската дејност со индивидуи и групи. Најголем дел од средствата беа подарени на деца без родители. Истото сакам да го сторам и со продажбата на оваа книга. Дел од финансиите ќе бидат наменети за дечиња во слична ситуација овде во Македонија. Ова го правам за спомен на мојот татко – кој и тој беше дете без родители, израснат буквално на улица”.ни изјави Гордана Винчиќ.

На 19ти декември во Социјалниот центар „Дуња” во Скопје сите љубители на уметноста ќе имаат можност повторно да присуствуваат на промовирање на оваа книга и изложба.

-„ А веднаш по новогодишните празници ќе следуваат промоции на ширум Македонија, во сите градови и места каде што мојот татко ископувал и истражувал. Добив понуда книгата да биде преведена на англиски и шведски јазик а книгата ќе добие и европска промоција”, рече Винчиќ

Делата на Гордана Винчиќ се продаваат на платформата Auroom.store

Од ископувањата во Хераклеа и Стоби-60-те години на минатиот век,.