Денеска граѓаните од Демир Капија и од околните населби што припаѓаат на Демиркаписка општина, го прославија големиот христијански празник Богојавление Водици.

Како што е познато на овој празник во водите на реката Јордан бил крстен нашиот спасител Господ Исус Христос од Свети Јован Крстител.По тој повод денеска претпладне верниците ја посетија црквата Света Богородица во Демир Капија за да присуствуваат на отслужувањето на светата божествена литургија посветена на Синот божји и на Света Богородица. Според преданието по отслужената света божествена литургија од страна на свештеникот Виктор Димовски, верниците со икони и со запалени свеќи во рацете,како и со биењето на камбаната, три пати ја заобиколија црквата,а потоа во црковниот двор свештеникот освети вода за секој верник да однесе дома за благослов на своите членови на секое семејство.На чинот на фрлањето на светиот крст во водите на реката Бошавица,верниците масовно присуствуваа со цел да видат кој годинава од скокачите ќе биде најсреќен да го извади светиот крст од водите на ова река и да добие благослов од свештеникот и награда од градоначалникот на општината Демир Капија г-дин Трајче Димитриев. По отпеаната литургија,светиот крст беше фрлен во водите на реката Бошавица.Од околу триесет скокачи најсреќен беше младинецот Цветан Стоевски. На момчето што го извади светиот крст од реката Бошавица градоначалникот на општината Демир Капија Трајче Димитриев му честита и му подари награда Златник со ликот на Свети Јован Крстител. А пак од името на Црковниот одбор при црквата Света Богородица на момчето му беше даден светиот крст да го задржи неколку дена и со него да ги посети христијанските семејства и да собира доброволен прилог. Инаку, со посетата на членовите на секое семејство им посакуваат здравје и среќа да ги служи преку целата година.