На 19.12.1595 година е осветен Моклишкиот манастир Св. Никола Моклишки. Моклишкиот манастир е споменик на културата заштитен со закон на Република Македонија. Манастирот е живописан од страна на Никола и неговите синови од с. Тимјаник и бил изграден непосредно до с.Моклиште по што го добил и името. Црквата е еднокорабна градба во чиј западен дел се наоѓа галерија со влез од јужната страна. Фрескоживописот е од два периода, од времето кога е изградена црквата и од 1879 година кога е повторно живописана. Манастирот претставува културен и образовен центар на Тиквешијата. Тука започнале со работа првите ќелијни училишта, а бил познат и по својата библиотека која располагала со повеќе од 20 товари со книги. До појавата на Егзархијата во конаците на манастирот по еден месец престојувале грчките владици. Денес за неговото опстојување многу добро се грижи Црковниот одбор на манастирот.

П.Камчевски