.jpg)
.png)
Овој викенд, 1 и 2 јули, по петти пат, во организација на здружението „Винотек“ од Кавадарци ќе се оддржи традиционалната винска регата, која годинава ќе донесе неколку новини.
Според најавите од организаторот, оваа година не очекува најмасовната регата до сега, на која учество ќе земат повеќе од 80 учесници од Србија, Бугарија и повеќе градови од Македонија.
Стартот на регатата чија цел е промоција на винската култура и традиција во Тиквешијата, е закажан во сабота, 1 јули, во 8 часот, и тоа со посета на винаријата „Лaзар“ во Градско. Веднаш потоа ќе следи и посета на винаријата Стоби, по што сите учесници ќе се упатат кон селото Уланци од каде во 10 часот и официјално ќе започне годинешното пловење по Вардар. Паузата за ручек е предвидена во селото Црвени Брегови каде што ќе бидат организирани и игри за сите учесници. Пловидбата завршува во селото Пепелиште, по што сите учесници ќе се упатат кон манастирот „Свети Ѓорѓи„ во Неготино, каде што и ќе се преноќи.
Вториот ден од годинашната регата носи посета на винаријата „Бовин“, од каде што сите учесници ќе заминат за Кавадарци, каде на едно од многуте лозови насади ќе биде прикажан процесот на печење ракија, по што ќе следи и завршната забава.
