Советот на Општина Кавадарци на последната (4 Седница) даде негативно мислење за детални геолошки истражувања на планината Кожуф.

„Многу е лесно некој да даде позитивно мислење за такво нешто, ако не живее во регионот во кој се планираат такви активности, рече претседателот на Советот Ристо Сакалиев.

Вака се изјасни мнозинството советници во Советот на општина Кавадарци по барањето за мислење добиено од Министерството за економија, во однос на барањето за доделување на концесија за вршење на детални геолошки истражувања на минерална суровина-металични минерални суровини на локалитетот Матушница-исток, општина Кавадарци и општина Гевгелија, за делот кој припаѓа на територијата на општина Кавадарци.

Советникот од ВМРО-ДПМНЕ Никола Трендафилов побара за вакви работи во иднина советниците да бидат подетално и навремено запознаени пред да гласаат. Затоа, рече, нивната советничка група гласа воздржано.

Ташо Радњански од советничката група на СДСМ и коалицијата нагласи дека е апсолутно против детални геолошки истражувања бидејќи како што додаде, тој опсег таму гравитира надолу кон реката Дошница. Тој појасни дека токму во водата од таа река, лежи можноста за дополнителна вода за пиење за неколку општини од регионот. Кавадарци, Неготино и Демир Капија.

Претседателот на Советот Ристо Сакалиев кој е независен советник но влезе во коалиција со социјалдемократите, рече дека кога се прават геолошки испитувања, се буши двеста-триста метри во длабочина.

-Подземните води не се гледаат, а минералите кои се бушат влегуваат во тие води и прават проблем. А токму од такви подземни води се пие вода. Мојот став е негативно мислење. Бидејќи и така сме отруени од постоечката индустрија, уште ова да не дотепа не ни треба. Многу е лесно некој да даде позитивно мислење за такво нешто, ако не живее во регионот во кој се планираат такви активности, нагласи Сакалиев.

Тој информираше дека е роден кај рудникот Ржаново и таму е веќе педесет години.

За негативно мислење н денешната четврта по ред седница, гласаа десет советници, а осум беа воздржани.