Градоначалникот на Општина Демир Капија, Трајче Димитриев со дел од општинската администрација беше во посета на Општина Брда од Словенија. Општина Демир Капија и Општина Брда имаат потпишано Меморандум за збратимување и соработка. Целта на оваа тридневна посета беше остварувањето на контакти со администрацијата на Општина Брда и Регионалната развојна агенција од Горишки Брда Словенија за добивање на информации и искуства за поголемо и заедничко искористување на средства од европските фондови, со што ќе се придонесе кон подобрување на локалниот економски развој на Демир Капија. За време на посетата делегацијата од Демир Капија имаше можност да се информира за проекти кои Општина Брда ги реализирала преку повици на Европската Комисија. Беа посетени неколку винарии, општинската винотека, етното село Шмартно, кои исто така имаат искористено неповратни средства од европските фондови за своето работење.