Забавениот откуп на сортата „смедеревка“ од која не се собрани уште околу 30-сетина милиони килограми грозје од која најголема количина е во Тиквешијата , се очекува да се одблокира.Со мерката донесена на Владата вчера,винарските визби за откупено грозје од сортата „смедеревка“ ќе добијат субвенции од два денари за килограм.

Министерот за земјоделство, шумарство и водостопанство Михаил Цветков вели дека субвенции ќе може да добијат винарските визби кои се запишани во регистрарот и кои ги имаат подмирено финансиските обврски кон производителите. Тие ќе треба да откупат минимум еден милион и 500 илјади килограми грозје од оваа сорта.

-„Смедеревката“ќе се откупува согласно договореното, односно 11 денари за 17 шеќерини единици. Ако грозјето е со повеќе од 17 шеќерни единици, тогаш откупната цена ќе биде повисока за 0,65 денари, а доколку е пониска, цената ќе се намали за 0,65 денари, вели Цветков.

- Оваа мерка ја донесовме поради тоа што на светскиот пазар каде винариите го продаваат наливното вино, цените се многу ниски. Со цел да бидат конкуретни на тој пазар, Владата им помага со оваа субвенција, додава министерот

Според него, мерката за откуп на грозјето од сортата „вранец“ ги дала очекуваните резултати бидејќи се откупени сите количини.

Директорот на Инспекторатот за земјоделство, Цветан Трипуновски посочи дека во досегашниот откуп немале никакви проблеми при проценката на грозјето.