Изложбата покажува како македонците се подготвуваа за учество на ЕП во фудбал Вечерва во Галеријата при Домот на културата “Иван Мазов - Климе“ беше отворена изложба на фотографии од италијанскиот фотограф Матео де Мајда, насловена како “За прв пат (La prima volta)“. Самата изложба има своја приказна. Имено минатото лето, фудбалската репрезентација на Северна Македонија за прв пат учествуваше на европското фудбалско првенство. Неколку недели претходно, италијанскиот фотограф Матео де Мајда (Matteo De Mayda) и новинарот Козимо Бизари (Cosimo Bizzarri) ја пропатуваа земјата и ги претставија нејзините жители како се подготвуваат за еден од најголемите спортски настани во својата историја. Изложбата ја организираше италијанската амбасада во соработка со ЛС Кавадарци и е дел од “Кавадаречка културна есен 2021“. На изложбата присуствуваа и одржаа пригоден говор, неговата екселенција Андреа Силвестри, амбасадор на Република Италија во Македонија и градоначалникот на Кавадарци Митко Јанчев. Меѓу присутните имаше многу сегашни и поранешни фудбалери на ФК Тиквеш.