Прес конференција на кандидатот за градоначалник на Кавадарци на СДСМ,Бетиане Китев.

Интегрален текст:

„Кавадарци има огромен туристички потенцијал, и можности за културен развој. Но, изминативе 8 години под локалната власт на ВМРО-ДПМНЕ, културниот живот во Кавадарци, и особено Тиквешкиот Гроздобер, беа целосно запоставени.

Тоа мора да се промени. Промените кои ќе му се случат на Кавадарци ќе бидат и во насока на враќање на сјајот на Тиквешкиот Гроздобер, и на културниот живот во нашата општина.

Ќе ги реконструираме домовите на културата во Ваташа, во Сопот, и во Дреново, кои моментално целосно се распаѓаат.

Тиквешкиот Гроздобер ќе стане регионален настан, препознатлив не само во Македонија, туку и низ цел Балкан. Посебен акцент ќе ставиме на Тиквешкиот карневал. Ќе го вратиме и саемот на земјоделски производи и машини, и ќе организираме саеми на вино.

Ќе го развиваме и винскиот туризам во Кавадарци со изградба на вински пат кој ќе го заобиколува градскиот парк и ќе завршува на улица “Дисанска“. Патот ќе располага со атрактивни туристички содржини и мини винарии за дегустација на вината од Тиквешијата.

Тиквешкото езеро ќе го вратиме на граѓаните! Имаме прекрасно езеро со огромен неискористен туристички потенцијал. Тиквешкото езеро ќе го промовираме како атрактивна туристичка атракција со можност за воведување на туристички тури со брод по езерото.

И селскиот туризам во подкожувските села нема да биде заборавен. Со помош на ЕУ фондови ќе ги доизградиме патиштата до подкожувските села со цел овој дел да стане привлечен и за домашни и за странски туристи.

Посебен акцент ќе биде ставен на зацврстување на врските со збратимените градови, но и соработката со други градови. Соработката ќе се прошири како во размена на ученици и студенти, во меѓусебна посета за културни манифестации, но и во соработка за поголеми проекти од заеднички интерес.

Почитувани сограѓани, овие избори се важни за сите нас. Да гласаме за промени! Да гласаме за враќање на животот во нашата општина! На Кавадарци му треба тим кој од Кавадарци ќе направи модерна европска општина!„ рече Китев на денешниот прес.