Кавадарци денеска го одбележува општинскиот празник.Повеке делегации положија цвеќе пред споменикот на паднатите борци на Градскиот плоштад.

Во изјава за медиумите, градоначалникот Александар Панов напомна дека станува збор за најголемиот празник на сите граѓани, без разлика дали живеат во градот или надвор од него. Упатувајќи им честитки на сите нив, тој нагласи дека е ова најсветол датум во историјата на Кавадарци, испишан со златни букви.

-7-ми Септември е круна на вековниот стремеж на нашиот народ за слобода. Ние денеска водиме мирнодобски битки со цел подобрување на условите за живот, рече Панов, осврнувајќи се на сите постигнати резултати во текот на оваа година.Тој потсети дека во одлична кондиција се сите училишта во општината, културните институции, спортската сала и комуналното претпријатие, набројувајќи ги инвестициите кои се завршени и тие кои во моментов се реализираат.

-Откако објектот стара лабораторија ни беше даден од Владата, пристапивме кон негова реконструкција и адаптација во детска градинка која ќе може да прими минимум 100 деца со што ќе одговориме на потребите од катче плус за најмладите, рече градоначалникот.

Ја спомна и реконструкцијата на високата зона за водоснабдување и последниот дел од замената на цементно азбестните цевки, со што како што нагласи, Кавадарци ќе биде првиот град кој ќе нема вакви цевки во водоводната мрежа.

Зборувајќи за инвестициите помеѓу два празника, Панов информираше и за асфалтирањето на патот Крњево Бохула. Ги најави изградбата на одморалиште за пензионери во село Чемерско и реконструкцијата на патот меѓу селата Страгово и Крњево.

Свечената седница на Советот на општината е закажана за вечерва, а во нејзините рамките ќе бидат доделени и седмосептемвриските награди.