На 24 септември 1943 година , со наредба на ГШ на НО војска и партизанските единици на Македонија на планината Кајмакчалан од партизанските одреди “Добри Даскалов“, “Сава Михајлов“ како и дел од битолскиот одред “Гоце Делчев“ е формиран баталјонот “Страшо Пинџур“.

Со наредбата е формиран и Штаб на одредот кој го сочинувале: Диме Туриманџовски-Горски, командант, НиколаТодоровски-политички комесар, Тихомир Милошевски, заманик командант и Ристо Бајалски- зам. Полит. Комесар. На денот на формирањето баталјонот “Страшо Пинџур“ имал 144 борци, меѓу кои и 19 италијански војници. На 2 октомври баталјонот ја извршил првата борбена задача напаѓајќи го германското обезбедување на рудникот Дудица, при што заробиле 25 германски војници и офицери, многу оружје и муниција, а 80 рудари од рудникот им се приклучиле на партизаните. По низа успешни борбени акции на 20 декември 1943 година баталјонот станува составен дел на Втората македонска ударна бригада.