Основниот суд во Велес одлучи да го одложи судското рочиште за стечајна постапка за Винарската визба ,,Повардарие” од Неготино

и истото е префрлено во надлежност на Врховен суд. Лозарите се задоволни од ваквата одлука на судот со очекување дека ќе преовлада разумот и дека нема да останат со празни раце.Според нив,доколку некој бара стечај,тоа треба да бидат тие, затоа што имаат и најголеми побарувања од неготинскиот подрум.

-„Повардарие ми должи над десет илјади евра за предадено грозје од оваа реколта,ако некој треба да бара стечај тогаш тоа сум јас,а такви лозари како мене ги има многу,зашто ние сме оштетени,но мораме да бидеме разумни и да работиме на тоа да се спаси визбата, а некој таму горе кој сака да игра врз грбот на лозарите, нека го прави тоа на друго место, а не овде“,коментира лозар од Неготино.

Според лидерот на лозарите Љупчо Аризанов,ваквиот потег на Царинската управа не е во ред и порачува таму да размислат добро што ќе се случи со Тиквешијата доколку визбата пропадне.

-„Денеска лозарите се обединија,покажаа дека не може никој да си игра со нивниот труд и мака,не дозволија да им пропаднат парите,се надевам дека на крај се добро ќе се заврши и дека конечно ќе се најде начин еднаш засекогаш лозарите да се спокојни и да се посветат на своето производство,коментира Аризанов.

Близу седум илјади лозари од Тиквешијата која важи за најголем производител на грозје во земјава , соработуваат со неготинскиот подрум, кој наместо планираните дваесет милиони килограми, годинава откупи плус десет милиони килограми, но парите останаа неисплатени.

Од ВВ Повардарие, кои присуствуваа на протестот пред судот во Велес, ја поздравуваат одлуката на Судот и сметаат дека е реална. Очекуваат се да се реши во најдобар ред,зашто и тие како и лозарите сакаат визбата да работи.

преземено од АктуелнОбјективно

Билјана Н.Тошевски