Нашите момци досега не покажаа ништо од талентот со кој располагаат

Машката јуниорската кошаркарска репрезентација на Македонија која учествува на Европското првенство што се одржува во Измир, Турција доживеа пораз од Израел во првото коло со резултат 70-79. Во нашиот состав имаше само три расположени кошаркари и тоа Симиќ кој оствари дабл-дабл со 25 поени и 12 скока, Шошкиќ имаше 18 поени, 8 скока а Бошалески реализираше 10 поени и 9 скока. Нашите момци тешко настрадаа и на вториот меч откако загубија од Франција со преубедливи 47-104. Единствениот со двоцифрен ефект во македоската репрезентација беше Петар Башоски кој постигна 12 поени за само девет минути игра. Преостанува уште дуелот со Велика Британија кој во оваа фаза нема големо значење. Имено Европските првенства во А-дивизијата имаат интересен систем на натпреварување поради кој дуелите во групната фаза и немаат големо резултатско значење. Нема испаѓање од групата и сите четири репрезентации одат во осминафиналето каде вкрстуваат со селекциите од другата група (А со Б, Ц со Д). Можно е репрезезентација која го освоила првото место во групата, на крајот да испадне, како што беше случај на претходното М20 Европско првенство, во 2019 година, кога Србија беше прва за на крајот да го освои 15. место и отиде во Б-дивизијата. Групата на Македонија во осминафиналето вкрстува со Шпанија, Полска, Турција и Германија.

Мики В.