Во предигра на финалето, Борец го победи Металург и го освои третото место.

Фудбалерите на Победа и денеска ја покажаа својата класа, и со убедливи 6-0 против домаќинот Тиквеш 1930 го одбранија шампионскиот наслов на меморијалниот турнир „Вуко Каров“ кој по осумнаесетти пат се оддржа во Кавадарци.

Големиот триумф беше најавен уште по четири минути игра кога Трајковски погоди за 1-0. Предноста на гостите од Прилеп ја удвои Шаркоски, за четири минути подоцна на листата на стрелци да се запише и Гешоски за 3-0. Но, и оваа предност не ги задоволи прилепчани, кои на полувреме заминаа со предност од 4 гола откако Наумоски погоди од слободен удар.

Со својот втор гол Трајковски ја „пукна петардата“ на почетокот на второто полувреме, а конечните 6-0 ги постави Гешовски на три минути пред крајот.

Во предигра на финалето, Борец со голот на Горан Димовски го победи Металург и стигна до третото место.

Играчот на прилепска Победа, Даниел Карчески со три постигнати гола беше прогласен за најдобар стрелец, додека Александар Ангелков кој на вчерашниот натпревар помеѓу Тиквеш и Борец одбрани два пенали го доби признанието за најдобар играч на турнирот.